မလာယာ တက္ကသိုလ်မှာတုန်းက qualitative research module သင်တဲ့ ဆရာမက အဝါရောင် ငှက်ပျောသီးကို ပြပြီး၊ ဒီငှက်ပျောသီးကို ဘယ်လို မြင်ကြလဲလို့ မေးပါတယ်။
တချို့က အဝါရောင်၊ yellow လို့ဖြေပါတယ်။
စားလို့ကောင်းတယ်၊ delicious လို့ ဖြေတဲ့ လူရှိတယ်။
တချို့က ချိုတယ်၊ sweet လို့ဖြေတယ်။
ရှည်တယ်၊ long လို့ တစ်ယောက်က ဖြေတယ်။
ကျွန်မကတော့ ကျန်းမာစေတယ်၊ healthy လို့အဖြေလိုက်ပါတယ်။
ကျွန်မတို့ ကျောင်းသားတွေ ဖြေတဲ့ အဖြေကို ကြည့်ပြီး၊ ငှက်ပျောသီး တစ်လုံးအပေါ် ကြည့်မြင်တဲ့ လူတွေရဲ့ အမြင် မတူညီပုံကို သိသာအောင် ရှင်းပြခဲ့ပါတယ်။ ငှက်ပျောသီးရဲ့ အရသာကို ကြည့်ပြီး မှတ်ချက်ပေးတဲ့သူရှိတယ်၊ ရောင်သို့မဟုတ် ပုံသဏ္ဍာန်ကို ကြည့်တဲ့သူရှိတယ်။ ငှက်ပျောသီးကပေးတဲ့ အကျိုးအာနိသင်ကို ကြည့်တဲ့ လူရှိတယ်။ ကိုယ်ကြည့်တဲ့ ရှုထောင့် အပေါ်မှာ မူတည်ပြီး၊ အမြင်တွေ ကွဲပြားတယ်ပေါ့။
ဒီလိုပဲ တခြား အကြောင်းအရာ သို့မဟုတ် လူပုဂ္ဂိုလ်ကို ကြည့်တဲ့အခါ ကိုယ်ဘယ်ရှုထောင့်ကနေ ကြည့်သလဲအပေါ်မူတည်ပြီး၊ အပြင်တွေကွဲသွားပါတယ်။ လူတစ်ယာက် ပ်ိန်တာ ဝတာကို ကြည့်မလား၊ မျက်နှာ ကြည်လင်ပြီး ပြုံးချိုနေတာကို ကြည့်မလား၊ သူဝတ်ထားတဲ့ အဝတ်အစားကို ကြည့်မလား၊ ဒါမှမဟုတ် သူ့ရဲ့ အပြုအမူ လုပ်ဆောင်ချက်တွေကို ကြည့်မလား။ ကြည့်တဲ့ အပေါ်မှာ မူတည်ပါတယ်။ ကိ်ုယ်ဘာကို ကြည့်မလဲ ဆိုတာ ဘဝအတွေ့အကြုံ ရင့်ကျက်မှုက ဆုံးဖြတ်သွားပါတယ်။
ဘဝအတွေ့အကြုံ များလာတဲ့အခါ ပတ်ဝန်းကျင်ကို တကယ့်အရှိအတိုင်း ကြည့်တတ်လာတယ်။ ခြုံငုံပြီး ကြည့်တတ်လာတယ်။ ကိ်ုယ်ြမင်သလို တခြားတစ်ယောက်က မြင်ချင်မှ မြင်လိမ့်မယ် ဆိုတာကို နားလည်သဘောပေါက်လာတယ်။ မတူညီတဲ့ အမြင်တချို့ကို နားလည်လက်ခံ ပေးနိုင်တယ်။ လက်ခံလို့ မရနိုင်လောက်အောင်၊ တဖက်စွန်းရောက်သွားတဲ့ ဆန့်ကျင်ဘက် အမြင်မျိုးကို သူ့သဘောအတိုင်း ဥပက္ခာပြုတတ်သွားတယ်။ မတူညီတဲ့ အမြင်အားလုံကို ညှိယူဖို့ မဖြစ်နိုင်ဘူး ဆိုတာကို သဘောပေါက်ထားတယ်။ ဥပမာ- ချိုတဲ့ ငှက်ပျောသီးကို ခါးပါတယ် ဆိုရင် မခက်လား။
ပတ်ဝန်းကျင်ကို ကြည့်မြင်တဲ့အခါမှာ အရင်က သိထားတဲ့ အကြောင်းအရာကို ဖယ်မထုတ်ထားရင် အမြင်တွေ ပြောင်းလဲဖို့ ခက်ပါတယ်။ ဆိုပါစို့- မူးယစ်ဆေးသုံးလို့ ထောင်ကျဖူးတဲ့ လူငယ်တစ်ယောက် သူ ပြုခဲ့တဲ့အမှားကို နောင်တရပြီး၊ ကောင်းအောင် ပြုပြင်နေထိုင်တယ်ဆိုရင် လူတွေက အခုကောင်းနေတာကို မြင်သလား၊ အရင်ဆေးစွဲခဲ့တာကိုပဲ မြင်သလား။ အရင်က ပုံရိပ်ဟောင်းကို ဖယ်မထားနိုင်တဲ့ လူတချို့က လူငယ်လေးကို ဆေးသမားပါကွာဆိုတဲ့ အမြင်နဲ့ အထင်အမြင်သေး ကြပါလိမ့်မယ်။ လက်ရှိကောင်းနေတဲ့ အနေအထားကို ကြည့်တတ်တဲ့ သူတွေက လူငယ်လေးကို ချီးကျူးကြမယ်၊ ရှေ့ဆက် သူ့ဘဝလေး ကောင်းစားအောင် အားပေးကူညီ ကြလိမ့်မယ်။
ဒီလိုပါပဲ ကျွန်မတို့ လူတွေကို ဘယ်လိုကြည့်မလဲ၊ ပတ်ဝန်းကျင်ကို ဘယ်လိုကြည့်မလဲ။ ချစ်တဲ့ စိတ်နဲ့ ကြည့်မလား၊ အမုန်းစိတ် မကောင်းမြင်စိတ်နဲ့ ကြည့်မလား။ အဖြူအမဲ အသားအရောင်ကို ကြည့်မလား၊ ဘာသာယုံကြည်မှုကို ကြည့်မလား။ ကိုယ်ကြည့်တဲ့ အပေါ်မူတည်ပြီး၊ ကိုယ်ရဲ့ အပြောအဆို အပြုအမူတွေ ကွဲပြားပါတယ်။ ကိုယ်ပြောသမျှ လုပ်ဆောင်သမျှ အရာတွေဟာ ကိုယ့်ရေးတဲ့ သမိုင်းပဲ ဖြစ်ပါတယ်။ ဘယ်လို ဘဝ သမိုင်းကြောင်းကို ရေးမလဲဆိုတာ ကိုယ်တိုင် ရွေးချယ်ခွင့် ရှိကြပါတယ်။
ချစ်ခြင်းမေတ္တာဖြင့်
စံပယ်ဖြူ
၂၁-၀၇-၂၀၁၉
